Ut monsterlik TikTok-plan van Paultje
Vör dit aventuuër zeen eîgelik geîn wuuërt, zoeë spannendj!
Um ut uch tóch uut te kunne legke, motte vae beginne beej ut begîn …
De Wöllebäö
Hejje oeëts gehuuërdj van dieëze geheimzinnige griezel? De Wöllebäö es un gedrocht dejje noeëts tieëge wultj kaome. Dae laotj wichter völ bäöke. Zoeë gieët ut verhaol det in Wieërt al hoongerte jaore verteldj waertj.
Ze zegke det alleîn al ut neume van ziéne naam gevaorlik es!
“Gae dörftj ut uut te spraeke?”
Naw, dan gebroeëktj de klânke van “völ bäöke” mer in ut haardop zegke van “Wöllebäö”.
Ajjen ut lef hetj teminste, want de mieëste minse dörve dit neet.
Hae es bekans aevegroeët as unne kleîne lantaerepaol, mer waal völ dikker. Ut schientj det dae dikke, good gevöldje boêk kûmtj doeër ut aete van kleîn wichter. Lang, vettige broén haor grujje oeëverâl op zien aafstoeëtelikke liëf.
Loupe deutte op alle 4 zien behaordje poeëte. Daorum stieëtte almer kroomp vuuëroevër geboeëge.
Dan kujje zien lieëlikke lang táng good zeen.
Eedere vînger hieët unne joekel van unne kromme nieëgel. Det es um uch good te kunne griêpe.
Âldaag as de zon ônger gieët, stieëtte vör uch klaor…
Paultje es neet bang!
Un paar jaor trök huuërtj Paultje dit akelige griezelverhaol vör ’t ieërst.
Toch es ut neet spannendj vör ‘m: Paultje hieët namelik nêrges kneîp vör, dus ouch neet vör De Wöllebäö!
Zoeë kiektje online offen iets kân vînge, mer op TikTok en YouTube stieët niks oeëver dit Wieërter misbaksel. Dus gieët Paultje zêlf op zeûk.
Mette nowwe iPhone 15 (vuuërige waek gekreege vör ziene tieëndje verjaordaag) zal Paultje dit gedrocht dan opneeme en uploade nao TikTok. Zoeë kân eedereîn zeen wi-j dae voêlwammes d’r uut zuuët!
Daorum fietsj Paultje inne vekânsie dék langs de bosrand, de tillefoon klaor um te filme. Hae zal det kríng toch waal unne kieër tieëgekaomе?
Mer dieëze zoeëmeraovendj hieëtten al d’n hieëlen tiêd un duuster vuuërgeveul, zieëker asse oeëver un aafgelaege zândpaetje fietsj.
Ut waertj doonkeler en doonkeler.
De rillinge loupe oeëver ziene rök, ut es tiêd um te stoppe vör vandaag…
Bloodstollendje gebuuërtenis
Mer es ut al te stoppe?
Want obbeins gâlmtj d’r unnen ieëzingwekkendje schrieëw doeër ut schieëmerendje bos!
Dae klânk triltj doeër tot eeder spierke in zien liêf: de haor op zien érm staon réchtop!
Zêlfs vör dappere Paultje is dit zoéë bloodstollendj dette d’r vanne kneîp de zök in zetj.
Hieël effe lieëktj ut offen onmuuëgelik vöruut kûmtj:
“kerdjuu, ich wil wégk heej!”, dînktj Paultje in paniek.
En zjuust dan, nét op dét memênt es ut net as of d’r achter iets aan ut fiétse-steûlke trektj.
Paultje wultj nao hoês en waal zoeë gaw as muuëgelik!
Good slaope deutte dae nacht neteûrlik neet en asse smêrges bezörgtj nao ziene fiets kiektj dan schriktje zich te börste:
aan eîn vanne losse speîk tössen ut achterwiel hangtj unne mismaakdje lange nieëgel met e paar vettige broén haor d’r aan vast!
Stieët ut op camera?
“Waat zoot d’r dan aan ziene fiets? Woor det messchien De Wöllebäö?”
Op dét memênt snaptj Paultje dette dieëze gruwel toevalligerwieës tóch op video vastgelagdj hieët.
Gaw paktje ziene tillefoon um te kieke of dao un opnaame van és.
Wuldje ouch wieëte of De Wöllebäö op video stieët?
Ajje zeûktj op Paultje beej TikTok kujjen ‘m messchien waal vînge…